ف يونيو 2016، شديت لباك ديالي ب 10 فالوطني، و 12 فالمجموع، المدرسة الوحيدة لي تهزيت فيها هي المدرسة الوطنية للتعليم باش تولي استاد ديال الرياضة، و لكن انا كنت كنشوف راسي نقدر نعطي بزاف، و كان عندي طموح اكبر بكثير من انني نكون استاد ديال الرياضة، فالصيف ديال 2016، خديت القرار ديال انني غادي نقرا لاول مرة فحياتي، هد المرة غادي نقرا ديال بصح، و لي شجعني بزاف هو انني عرفت مزال عندي فرصة اخرى نعوض فيها على داكشي لي ضيعت فالباك، بفضل الله اولا، و بقوة الإرادة، قدرت انني ندوز من شخص ماكيقدرش إفوت نصف ساعة قدام الكتاب، إلى إنسان كيقرا 8 سوايع فنهار واخا ماتكونش راشقا ليا حيت كان عندي هدف واضح، و ميمكنش نضيع الفرصة لي كفيلة انها تغير ليا حياتي للاحسن، خصوصا ان التعامل ديال العائلة كان تبدل معايا مين نجحت فلباك بنقطة هابطة و هادشي كان اثر عليا، وليت انا رفيق سوء بنسبة العائلة و زيد عليها ان اكبر هدف عندي كان هوا انني نكون مفخره للاب ديالي حيت عمرني درت شي حاجة ليتخليه إفتاخر بيا، بديت فالدورة 1، كنحاول انني نعطي جهدي كامل، كنوجد الحصة قبل متبدا و في وسط الحصة باش منسهاش ولو ثانية، كنريح فصف الاول و كنسول الاساتدة ما امكن و يدي ماكتهبطش كيخاصني ندوي وسط المحاضرة ما امكن، باش اولا مانسهاش و نستافد من الحصة ما امكن، و فنفس الوقت باش نقدر نطور من المستوى ديالي فالفرنسية خصوصا انني فالباك ماكنتش كنقدر نكون جملة مفيدة بالفرنسية و ماكانش كيهمني النظرة ديال الناس واخا ماكنعرفش ندوي مزيان بالفرنسية، المهم عندي هو نتعلم، و هادشي خلاني نجلب الإنتباه ديال الاساتدة و الإنتباه ديال الطلبة المتفوقين و هادشي كامل فصالحي ايعاوني باش نوصل الهدف ديالي إن شاء الله، واحد استادة ديال مادة المحاسبة عطاتني نصيحة بقيت خدام بيها تال دبا، قالت ليا إيلا بغيتي تفوق و تكون من الاوائل خاصك تستغل اى مصدر ديال المعلومة ممكن، يعني تقرا وسط المحاضرة و تحاول تستافد منها ما امكن، و تحاول تقرا الكتوبا و تقرا من يوتوب، و تدير سوايع، مهم هوا تحاول انك تاخد اكبر كمية ديال المعلومات و داكشي لي درت من تما، كنت كنقرا ما امكن، و درت سوايع، لقيت راسي وليت فايت الپروغرام ديال الاستاد، كنت كنسول على عتبة الإنتقاء باش نقدر ندوز ENCG كانو كيقولو ليا إلا جبتي 14 تقدر تدوز اي ENCG فالمغرب، صف حطيت الهدف نجيب 14، و تقاتلت بجهدي كامل و فالآخر جبت 15.72 و كانت اكبر فرحة فحياتي حسيت بواحد الإفتخار كبير، و هادشي رجع فيا واحد الثقة في النفس لي كبيرة بزاف

من بعد قدرت انني نبني واحد الروتين لي ايخليني في القمة، روتين ديال الخدمة 8 سوايع في النهار، روتين ديال نقرا قبل الحصة، وسط الحصة و من بعد الحصة، روتين ديال نقرا و نشرح لصحابي فنفس الوقت، الشرح خلاني نفهم الدروس اكثر و كنت كنستافد من الاسئلة ديالهم حيت كيقدرو إسولوني فشي موضوع لي انا كنت ناسيه ولا ماكنتش مراجعو مزيان و هدشي خلاني نزيد نتفوق، و هادشي بالرغم من عدم توفر المعلومة ديك الساعة، اما دابا الحمد لله، اي معلومة اتحتاجوها اتلقاوها في القناة عندي في اليوتوب كنجوب فيها على جميع الاسئلة ديال الطلبة، باش ميدوزوش من دكشي لي دزت منو انا باش نوصل لهد المستوى، إيلا ضمنتي الدورة 1 راك ضمنتي العامين لولا كاملة، ليوما نتا مامحتاجش تدوز 8 سوايع في البحت على المعلومة لي اتقودك للتفوق، حيث صايبنا مجموعة خاصة بينا سميتها ECO ACCRO و مؤطرة من طرف دكاترة، الهدف منها هو اننا نعاونوك تبدل حيتاك للاحسن كيفما تاحنا واحد الوقت عاونونا ناس اخرين، كلما عليك هو تسجل معانا و حنا انديرو مافي جهدنا باش تستافد من 7 سنوات خبرة في التعليم العالي و توصل الاهداف ديالك إن شاء الله.